မိမိဖါဖါအဆၧအဲၪအဂဲး

လၧြဎံၬဆၧအဲၪဆၧကွံၩဖၧၩ့  ထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩဖရၫ့စ့ၭ  အဆၧၥီၪ့ဆၧၥၫ့နီၪမွဲဝ့ၫဒၪ မိမိဖါဖါအဆၧအဲၪအဂဲးအကၠီၩ့နီၪလီၫႉ  ဖိၪၥၪလဂၩစထၪ့အီၪဖျဲၪ့  ခီၫဒၪလၧအခံၫ့နီၪ ပကဘၪ ယိဂ့ၩယိဘၪထီးလူၬထီးဆံၫ့ လိၪဝ့ၫဒၪအၪမၬဒ့ၭနီၪလီၫႉ ဖိၪၥၪမိၡါခံးဂၩ့အဂးမွဲဂ့ၩႇ ဆၧကိၪ့ဘၪကိၪ့ၥ့ၪအဂးမွဲဂ့ၩ ဆၧအီၪမုၬအီၪဆီၫ့အဂးမွဲဂ့ၩ ဆၧကိမံၩ့အဂး ပကဘၪယိဆၧၫ့ထီးအလူၬနီၪလီၫႉ  

အဲၪကွံၩဘၪထၧၫ့ဖုဝဲထံၩၥိၭ ထီးအလူၬၥံၪဧ့ႇ  ဆၧလၧပကဲၪမိဖါၥံၪလဖၪနီၪ ပကဘၪချဲၩ့ဒၧၫ့ဖိၪၥၪလၧဆၧချဲၩ့ဆၧၫ့ ဆၧနံမွံၫနီၪလီၫႉ ဆၧလၧဖိၪၥၪအန့ၩခၠၧၫ့နီၪ ဒၪဘၪမိဖါအဆၧနံမွံၫစွါဘဲၫႇ  ဆၧလၧၦၡၩအဆၧဖံၭထံၩဖံၭၥိၭႇ အဆၧနံမွံၫၥံၪနီၪ မဂ့ၩမၬလဲၪ့  မဆၧၫ့မၬလဲၪ့ ဆီၫ့မီၫ့အၪ့ဎၬ ထီးန့ၬထၭဝ့ၫၥ့ၪလၧ  အၥၭခံဖၧၩ့နီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ ဖိၪၥၪလဂၩကလ့ၩထၪ့လ့ၩထီၫ့ ဂ့ၩဂ့ၩဘၪဘၪကန့ၬအဂးမွဲဂ့ၩႇ ကၥ့ၪယၪနၪၥ့ၪ ဆၧအဲၪဆၧကွံၩ့အဂဲးအဖးကန့ၬအဂး မွဲဝ့ၫဒၪ မိဖါအတၩလၫ့နီၪလီၫႉ ပကဲၪမိဖါၥံၪကဒီၪ့ ပၥီၫ့ထၪ့အ့ၪဖိၪၥၪ ဆၧအဲၪဆၧကွံၩအဂဲးအဖးစွါဘိၫႇ ဖိၪၥၪကၥ့ၪယၪကဆါဎြံၬအဆၧအဲၪဆၧကွံၩ လကၭဒ့ၭဘၪႇ ကဆါဎြံၬအဆၧအဲၪဆၧကွံၩနီၪ ကဖျီၪ့ထၪ့လၧ ဖိၪၥၪအဖၫ့ခိၪနီၪလီၫႉ

အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မိဖါအဆၧအဲၪဆၧကွံၩနီၪ ကအီၪဖျဲၪ့ထၪ့ဖိၪၥၪအဂး မွဲဝ့ၫအဝံအအစၧၩ့ဂီၩ့ ဂံၪ့ဒီၪ့ဖိၪအဂးနီၪ မွဲဝ့ၫဒၪအခၪ့ထံၭခၪ့ဎၧၩ့နီၪလီၫႉ လကၭဒ့ၭဘၪႇ ဖိၪၥၪလဂၩနီၪအ့ၪန့ၬထၪ့ဘၪ မိဖါအဆၧအဲၪဆၧကွံၩ  လၧၫ့လၧၫ့ဎွ့ၩဎွ့ၩစွါဘဲၫနီၪႇ အဝ့ၫအဆၧၥၭမၧၫ့ထၧၫ့ဘီၩ့ယၫအဂး  ကလၧၫ့ဎွ့ၩဝ့ၫဒၪလၧ ဆၧမုၬဆၧလၩဎိၩဒိၪနီၪအကၠီၩ့  ၥၫ့ဎွၩဖရၫ့စ့ၭ  အဆၧၥီၫ့ဆၧၥၫ့အီၪဝ့ၫဒၪ  ဘဲၫယီၩၥိၭအဂဲး ယရၩလၩ့န့အ့ၪဘၪနၥံၪလၧ  ဆၧအဲၪဆၧကွံၩ ဎိၩဒိၪဖၧၩ့နီၪလီၫႉ  အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫဎွ့ၩဝ့ၫဒၪလၧ ကဆါဎြံၬအဆၧအဲၪဆၧကွံၩ လါဆံၭႉ